ಮೈಸೂರು: ಇಬ್ಬರು ಹಲ್ಲೆಕೋರ ಸಹೋದರರಿಗೆ ಜೈಲು ಶಿಕ್ಷೆ ವಿಧಿಸಿ ಮೈಸೂರಿನ ಒಂದನೇ ಅಪರ ಜಿಲ್ಲಾ ಮತ್ತ ಸತ್ರ ನ್ಯಾಯಾಧೀಶರಾದ ಎಸ್.ಸುಧೀಂದ್ರನಾಥ್ ಅವರು ತೀರ್ಪು ನೀಡಿದ್ದಾರೆ.
ನಂಜನಗೂಡು ತಾಲೂಕು ಕೆಂಪಿಸಿದ್ದನಹುಂಡಿ ಗ್ರಾಮದವರಾದ ಕೆ.ಜೆ.ಉಮೇಶ್ (19) ಮತ್ತು ಕೆ.ಜೆ.ನಾಗೇಶ್ (24) ಶಿಕ್ಷೆಗೆ ಗುರಿಯಾದವರಾಗಿದ್ದು, ಉಮೇಶ್‍ಗೆ 7 ವರ್ಷ ಕಠಿಣ ಜೈಲು ಶಿಕ್ಷೆ ಮತ್ತು 20 ಸಾವಿರ ರೂ. ದಂಡ ಮತ್ತು ನಾಗೇಶ್‍ಗೆ ಒಂದು ವರ್ಷ ಕಠಿಣ ಜೈಲು ಶಿಕ್ಷೆ ಮತ್ತು 5 ಸಾವಿರ ದಂಡ ವಿಧಿಸಲಾಗಿದೆ.
ವಿವರ: ಶಿಕ್ಷೆಗೊಳಗಾದ ಸಹೋದರರು ಜಮೀನು ಮತ್ತು ಹಲ್ಲೆಗೊಳಗಾದ ಕೆ.ಕೆ.ಶಿವನಂಜ ಮತ್ತು ಕೆ.ಕೆ.ನಾಗರಾಜು ಸಹೋದರರ ಜಮೀನು ಅಕ್ಕಪಕ್ಕದಲ್ಲಿವೆ. 2014ರ ಜ.3ರಂದು ಈ ಹಲ್ಲೆಕೋರ ಸಹೋದರರು ತಮ್ಮ ಪಕ್ಕದ ಜಮೀನಿನ ತೆವರನ್ನು ಕಿತ್ತು ಹಾಕಿ ಉಳುಮೆ ಮಾಡಿದ್ದರು.
ಅಂದು ಸಂಜೆ ಈ ಸಂಬಂಧ ಪ್ರಶ್ನಿಸಲು ಅವರ ಮನೆ ಬಳಿ ಹೋದ ಕೆ.ಕೆ.ಶಿವನಂಜ ಅವರ ತಲೆ ಮೇಲೆ ಉಮೇಶ ಮಚ್ಚಿನಿಂದ ಹಲ್ಲೆ ಮಾಡಿ ತೀವ್ರ ಗಾಯಗೊಳಿಸಿದ್ದ. ಈ ವೇಳೆ ಹಲ್ಲೆ ಬಿಡಿಸಲು ಹೋದ ನಾಗರಾಜನ ಮೇಲೆ ನಾಗೇಶ್ ಮಚ್ಚಿನಿಂದ ಹಲ್ಲೆ ನಡೆಸಿದ್ದ. ಈ ಘಟನೆಯಲ್ಲಿ ಶಿವನಂಜ ತೀವ್ರವಾಗಿ ಗಾಯಗೊಂಡರೆ, ನಾಗರಾಜುವಿಗೆ ಸಾಧಾರಣ ಗಾಯವಾಗಿತ್ತು.
ಈ ಸಂಬಂಧ ನಂಜನಗೂಡು ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ನ್ಯಾಯಾಲಯಕ್ಕೆ ಆರೋಪ ಪಟ್ಟಿ ಸಲ್ಲಿಸಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಧೀಶರು ಇಬ್ಬರೂ ಹಲ್ಲೆಕೋರ ಸಹೋದರರಿಗೆ ಶಿಕ್ಷೆ ವಿಧಿಸಿ ತೀರ್ಪು ನೀಡಿದ್ದಾರೆ. ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕರಾದ ಅಜೀತ್ ಕುಮಾರ್ ಡಿ.ಹಮಿಗೆ ವಾದ ಮಂಡಿಸಿದ್ದರು.
